ಅಂಕಣ ೧೨: ಸಾಫ್ಟ್ ಜಂಪ್

ಈ ಅವಕಾಶ ಇರೋದು ನಮಗೆ ಮಾತ್ರ ಅಂತ ಎದೆ ತಟ್ಟಿ  ಹೇಳಬಹುದು. ಒಂದು ಕಾಲವಿತ್ತು ಮತ್ತು  ಈಗಲೂ ಕೆಲವು ಕ್ಷೇತ್ರಗಳಲ್ಲಿ ಇದೆ ಸಹ, ಅಲ್ಲಿ  ಯಾರಾದರು  ನೌಕರಿಗೆ ಸೇರಿದರೆ ಜೀವನವಿಡಿ ಅದೇ ಸಂಸ್ಥೆಯಲ್ಲಿಯೇ ಕಾಲ ಕಳೆಯಬೇಕು. ಅದು ಸರಕಾರಿ ನೌಕರಿಯಾಗಿದ್ದರೆ ಅಬ್ಬಬ್ಬಾ ಅಂದರೆ ಒಂದು ಊರಿನಿಂದ ಇನ್ನೊಂದು ಊರಿಗೆ ವರ್ಗಾವಣೆ ಆಗಬಹುದೇ ವಿನಃ ಆ ಸಂಸ್ಥೆಯನ್ನೇ ಬಿಟ್ಟು ಹೊರಗಡೆ ಬರಲು ಆಗುವುದಿಲ್ಲ.  ಹಾಗೇನೆ ಒಂದು ಸಂಸ್ಥೆಯಲ್ಲಿ ಕೆಲಸಕ್ಕೆ ಸೇರಿ ಅದೇ ಸಂಸ್ಥೆಯಲ್ಲಿಯೇ ನಿವೃತ್ತಿ ಹೊಂದುವುದು ಅವರಿಗೂ ಸಹ ಒಂದು ಹೆಮ್ಮೆಯ ವಿಷಯವಾಗಿತ್ತು.  

ಆದರೆ ಸಾಫ್ಟ್ ಲೋಕದಲ್ಲಿ ಹಾಗಲ್ಲ, ಒಂದು ಕಂಪನಿ ಸಾಕು ಎನಿಸಿದರೆ, ಮತ್ತೊಂದಕ್ಕೆ  ಹೋಗಬಹುದು. ಹಾಗಂತ ಮನಸು ಬಂದಂತೆ ಕಂಪೆನಿಗಳನ್ನ ಬದಲಿಸಿಕೊಂಡು ಹೋಗಲು ಆಗುವುದಿಲ್ಲ. ಅದಕ್ಕೂ  ಒಂದು ಲಿಮಿಟ್ ಇರುತ್ತದೆ. ಈಗ ಬಿಡಿ, ಬರೀ ಸಾಫ್ಟ್ ವೇರ್ ಅಷ್ಟೇ ಅಲ್ಲ,  ಜಾಗತೀಕರಣದ ಪ್ರಭಾವದಿಂದ  ಪತ್ರಿಕಾ ಮಾಧ್ಯಮಗಳು, ಟಿ .ವಿ ಚಾನೆಲ್ ಗಳು, ಕಾಲ್ ಸೆಂಟರ್ ಗಳು, ಮ್ಯಾನುಫ್ಯಾಕ್ಚರಿಂಗ್ ಕಂಪನಿ ಗಳು..ಮುಂತಾದ.   ಅಲ್ಲಿಯೂ ಸಹ ಜನ ಒಂದು ಸಂಸ್ಥೆಯಿಂದ ಇನ್ನೊಂದು ಸಂಸ್ಥೆಗೆ ವಲಸೆ ಹೊಗುವುದನ್ನು ನೋಡಬಹುದು.

ಸಾಫ್ಟ್ ಲೋಕದಲ್ಲಿ ಒಬ್ಬ ಎಂಜಿನೀರ್ ಒಂದು ಕಂಪನಿ ಯಿಂದ ಇನ್ನೊಂದು ಕಂಪನಿಗೆ ಜಂಪ್ ಮಾಡಬೇಕಾದರೆ ಏನೆಲ್ಲಾ ಯೋಚನೆ ಮಾಡುತ್ತಾನೆ? ಸಬ್ಜೆಕ್ಟ್ ತುಂಬ ಇಂಟೆರೆಸ್ಟಿಂಗ್  ಆಗಿದೆ ಅಲ್ವಾ ? ಬನ್ನಿ ಹಾಗಿದ್ರೆ ಒಂದು ಸುತ್ತು ಇದರ ಸುತ್ತಲು ಗಿರಕಿ  ಹೊಡೆಯೋಣ!

೧. ಸಾಮಾನ್ಯವಾಗಿ ಆಗ ತಾನೇ ಕೆಲಸಕ್ಕೆ ಸೇರಿ ೧-೨ ವರ್ಷ ಅನುಭವ ಆಗಿರೋರು ಜಂಪ್ ಮಾಡೋದು ಅಷ್ಟೇನೂ ಕಷ್ಟ ಅಲ್ಲ. ಮತ್ತೆ ಇವರು ಬ್ಯಾಚುಲರ್ ಗಳು ಆಗಿರೋದ್ರಿಂದ ಇವರಿಗೆ ಕಮಿಟ್ಮೆಂಟ್ ಗಳು ಅಷ್ಟೊಂದು ಇರೋದಿಲ್ಲ. ಹೀಗಾಗಿ ಇವರು ಕಂಪನಿ ಬದಲಿಸ ಬೇಕಾದರೆ ಅಷ್ಟೊಂದು ಯೋಚನೆ ಮಾಡುವುದಿಲ್ಲ. ಒಂದೊಳ್ಳೆ ಆಫರ್ ಬಂದ್ರೆ, ಇರೋ ಕಂಪನಿಯಲ್ಲಿ ಕೆಲಸ ಸರಿಯಾಗಿಲ್ಲ ಅಂದ್ರೆ ಅಥವಾ ಏನೋ ಒಂದಲ್ಲ ಒಂದು ಕಿರಿಕ್ಕು ಇದ್ರೆ, ಆನ್ ಸೈಟ್ ಇರೋ ಅವಕಾಶ ಮತ್ತೊಂದು ಕಂಪನಿ ಯಲ್ಲಿ ಸಿಕ್ಕರೆ,  ಇವರು ಥಟ್ ಅಂತ ಇರೋ ಕಡೆಗೆ “ ಬೈ ಬೈ “ ಹೇಳಿಬಿಡುತ್ತಾರೆ.
೨. ಇನ್ನು ೩ ರಿಂದ  ೫ ವರುಷದ ಅನುಭವ ವಿರುವವರು, ಹೊರಗಡೆ ಮಾರ್ಕೆಟ್ ಸರಿ ಯಿಲ್ಲ ಅಂದ್ರೆ,  ಇರುವ ಕಂಪನಿ ಯಲ್ಲಿಯೇ ಒಂದು ಹುದ್ದೆ ಹುಡುಕಿಕೊಂಡು ಗಟ್ಟಿಯಾಗಿ ತಳವೂರಲು ನೋಡುತ್ತಿರುತ್ತಾರೆ. ಇಲ್ಲಾಂದ್ರೆ ಅವರು ಸಹ ಆರು ತಿಂಗಳಿಗೊಂದರಂತೆ interview ಕೊಡುತ್ತಲೇ ಇರುತ್ತಾರೆ.
೪. ಇನ್ನು ಕೆಲಸಕ್ಕೆ ಸೇರಿ ೫ - ೮ ವರ್ಷ ಅನುಭವ ಆಗಿರೋರು ಜಂಪ್ ಮಾಡ ಬೇಕಾದರೆ ತುಂಬಾ ಲೆಕ್ಕಾಚಾರಗಳು ಹಾಕುತ್ತಾರೆ. ಸಾಮಾನ್ಯವಾಗಿ ಇವರು ಸಂಸಾರಸ್ಥ ರಾಗಿರೋದ್ರಿಂದ  ಇವರಿಗೆ ಕಮಿಟ್ಮೆಂಟ್ ಗಳು ಜಾಸ್ತಿ.  ಹೋಂ ಲೋನ್, ಪರ್ಸನಲ್ ಲೋನ್, ಆಗ ತಾನೇ ಕೊಂಡ  ಹೊಚ್ಚ ಹೊಸ ಕಾರಿನ ಲೋನ್, ಬೆಂಗಳೂರು ಅಥವಾ ಮೈಸೂರಿನ ನಲ್ಲಿ ಇನ್ವೆಸ್ಟ್ ಮಾಡಿದ ಸೈಟ ಲೋನ್ .. ಹೀಗೆ ಲೋನ್ ಲೋಕದಲ್ಲಿ ಬಂಧಿಯಾಗಿರುವ ಇವರು ಇವೆಲ್ಲವುಗಳನ್ನು ಲೆಕ್ಕಾಚಾರ ಹಾಕಿ ಕೊಂಡೆ ಮುಂದಿನ ಹೆಜ್ಜೆ ಇಡುತ್ತಾರೆ.
೫. ಇನ್ನು ಕೊನೆಯದಾಗಿ ೧೦ ವರ್ಷ ಮೇಲೆ ಅನುಭವ ಉಳ್ಳವರು ಇರುವ ಕಡೆಯೇ ಸೀಟ್ ಬೆಲ್ಟ್ ಹಾಕಿಕೊಂಡು ಆಯಕಟ್ಟಿನ ಜಾಗದಲ್ಲಿ ಕೂತಿರುವುದರಿಂದ, ಇವರು ಕಂಪನಿ ಬದಲಿಸುವ ಶೇಕಡಾವಾರು ವಿರಳ ಎನ್ನಬಹುದು. ಕಂಪನಿ ಬದಲಿಸೋರು ಕೇವಲ ಹಣವನ್ನಷ್ಟೇ ನೋಡುತ್ತಾರೆ ಎನ್ನುವಮಾತು ಎಲ್ಲ ಕಾಲಕ್ಕೋ ಅಪ್ಲೈ ಆಗುವುದಿಲ್ಲ. ಬೆಂಗಳೂರಿನ ಟ್ರಾಫಿಕ್ ಗೆ ಹೆದರಿ ಕೆಲವರು ತಮ್ಮ ಮಕ್ಕಳ ಸ್ಕೂಲ್, ಹೆಂಡತಿಯ ಆಫಿಸ್ ಅಥವಾ ತಮ್ಮ ಮನೆಗೆ  ಹತ್ತಿರವಿರುವ ಕಂಪನಿ ಯನ್ನೇ ಆರಿಸಿಕೊಂಡು ಬದಲಿಸುತ್ತಾರೆ. ಹೀಗೆ ಮಾಡುವಾಗ ಸಂಬಳದ ಬಗ್ಗೆ ಅಷ್ಟೊಂದು ತಲೆ ಕೆಡಿಸಿಕೊಳ್ಳುವುದಿಲ್ಲ. ಇನ್ನು ಕೆಲವರು ತಮ್ಮ ಸಧ್ಯದ ಕೆಲಸ ನಿಂತ ನೀರಾಗಿದೆ ಅನ್ನಿಸಿದ ಕೂಡಲೇ ಹೊಸ ಛಾಲೆಂಜ್ ಗಾಗಿ ಕೆಲಸ ಬದಲಿಸುತ್ತಾರೆ. ಮತ್ತೆ ಕೆಲವರು ತಮ್ಮ ಅನುಭವಕ್ಕೆ ತಕ್ಕಂತೆ ಹುದ್ದೆಗಳು ಸಿಕ್ಕಾಗ ಸಂಬಳದ ಬಗ್ಗೆ ಅಷ್ಟೊಂದು ಚೌಕಾಸಿ ಮಾಡದೆ ಕೆಲಸ ಬದಲಿಸುತ್ತಾರೆ.  ಇನ್ನು ಹೆಂಗಸರಾದರೆ ಮದುವೆಯಾದಮೇಲೆ ತಮ್ಮ ಗಂಡನ ಕಂಪನಿಗೆ ಅಥವಾ ಕೆಲವೊಂದು ಸಲ ಗಂಡನೇ ಹೆಂಡತಿಯ ಕಂಪನಿಗೆ ಬದಲಾಗುವುದು ಉಂಟು. ಇದಕ್ಕಾಗಿ ಕೆಲವೊಂದು ಕಂಪನಿಗಳಲ್ಲಿ ವಿಶೇಷ ಸೌಲಭ್ಯಗಳೂ ಇರುತ್ತವೆ. ಕಂಪನಿ ಬದಲಾಯಿಸುವಾಗ  ತುಂಬಾ ಇಂಟೆರೆಸ್ಟಿಂಗ್ ವಿಷಯ ಅಂದರೆ:  ಒಂದೊಂದು ಸಲ ಕಂಪನಿ ಬದಲಿಸುವಾಗ ಇಂಟರ್ ವ್ಯೂ ನಲ್ಲಿ ಕೆಲವರು ಸೆಲೆಕ್ಟ್ ಆಗದೆ ಇದ್ದರೆ, ಮತ್ತೊಂದು ಸಲ ಸೆಲೆಕ್ಟ್ ಆದರೂ ಇವರೇ ಆ ಕಂಪನಿ ತಮಗೆ ಸೂಟ್ ಆಗುವುದಿಲ್ಲ ಎಂದು ಹೋಗುವುದಿಲ್ಲ. ವಿಶೇಷವೆಂದರೆ, ಕಂಪನಿ “A” ಯಿಂದ ಕಂಪನಿ “B” ಗೆ ಜಂಪ್ ಮಾಡಿ ಅಲ್ಲಿನ ವಾತಾವರಣ ಸರಿ ಹೋಗದಿದ್ದರೆ ಪುನಃ ತಮ್ಮ ಮೊದಲ ಕಂಪನಿ “A” ಗೆ ಬಂದು ಸೇರುವ ಜನರೂ ಸಾಫ್ಟ್ ಲೋಕದಲ್ಲಿ ಇದ್ದಾರೆ. ಇದನ್ನ ಸಾಫ್ಟ್ ಲೋಕದ ಭಾಷೆಯಲ್ಲಿ “welcome back policy “ ಅನ್ನುತ್ತಾರೆ. ಹೀಗೆ ಬದಲಾಗುತ್ತಿರುವ ಜಗತ್ತಿನಲ್ಲಿ, ಬದಲಾಗುತ್ತಿರುವ ನಾವೆಲ್ಲ ನಮ್ಮ  ನಮ್ಮ ಕಂಪೆನಿಗಳನ್ನು ಬದಲಾಯಿಸುವುದು ವಿಶೇಷವೇನು ಅಲ್ಲ ಬಿಡಿ. ಆದರೆ ಹೊರಗಡೆಯಿಂದ ನೋಡುವವರಿಗೆ ಇದೊಂದು ವಿಶೇಷ ಸಂಗತಿಯೇ ಸರಿ. ಈ ವಾರದ ಬಿಲ್ಡ್  ಲೇಬಲ್ : ಬದಲಾವಣೆ ಜಗದ ನಿಯಮ, ಬದಲಾಗುವುದು ಪ್ರಕೃತಿಯ ನಿಯಮ, ಬದಲಾಗುತ್ತಲೇ ಇರುವುದು ನಮ್ಮ ಜೀವನದ ನಿಯಮ, ಬರಿ ನಮ್ಮ ಕೆಲಸವನ್ನಷ್ಟೇ ಅಗತ್ಯಕ್ಕೆ ತಕ್ಕಂತೆ ಬೇರೆ ಬೇರೆ ಕಂಪನಿಗಳಿಗೆ ಬದಲಾಯಿಸುವುದು ಸಾಫ್ಟ್ ಲೋಕದ ನಿಯಮ. ಒಪ್ಕೊತೀರಾ?

ಅಂಕಣ ೧೧ : ಸಾಫ್ಟ್ ಲೋಕ ಮತ್ತು ಆನ್ ಲೈನ್ ಶಾಪಿಂಗ್

ಸಾಫ್ಟ್ ಲೋಕಕ್ಕೂ ಆನ್ ಲೈನ್ ಗೂ ಒಂದು ಬಿಡಲಾರದ ನಂಟು. ಅದರಲ್ಲೂ ಇತ್ತೀಚಿನ ದಿನಗಳಲ್ಲಿ ಆನ್ - ಲೈನ್ ಶಾಪಿಂಗ್ ಅನ್ನುವುದು ಒಂದು ರೆವೊಲುಶನ್  ಆಗಿ ಬಿಟ್ಟಿದೆ. ಹಲ್ಲುಜ್ಜುವ ಬ್ರಷ್ ನಿಂದ ಕಾಲಿಗೆ ಹಾಕಿ ಕೊಳ್ಳುವ ಚಪ್ಪಲಿಯ ವರೆಗೆ ನೀವು ಆನ್ - ಲೈನ್ ನಲ್ಲಿ ಶಾಪ್ ಮಾಡಬಹುದು. ಆನ್ - ಲೈನ್ ನಲ್ಲಿ ನೀವು ಆರ್ಡರ್ ಮಾಡಿದ ವಸ್ತುಗಳು ಒಂದೆರಡು ದಿನದಲ್ಲಿಯೇ ನಿಮ್ಮ ಮನೆಗೆ ಹಾಜರ್ ಆಗಿ ಬಿಡುತ್ತವೆ.

ಕಾಲೆಳೆದು ಕೊಂಡು  ಅಂಗಡಿಗೆ ಹೋಗಿ, ನೂರೆಂಟು ಚೌಕಾಸಿ ಮಾಡಿ, ಕೊನೆಗೆ ಇಷ್ಟವಾಗದೆ ಇದ್ದರೆ  ಇನ್ನೊಂದು ಅಂಗಡಿಗೆ ಹೋಗಿ ಅಲ್ಲೂ ಪುನಃ ಇದೆ ಕಥೆಯಾದರೆ ಜೋಲು ಮೊರೆ ಹಾಕ್ಕೊಂಡು ಮನೆಗೆ ಬರುವುದು ತಪ್ಪಿದ್ದಲ್ಲ. ಆದರೆ ಆನ್ - ಲೈನ್ ನಲ್ಲಿ ಹಾಗಲ್ಲ , ಸುಮ್ಮನೆ ಕೂತಲ್ಲೇ ಒಂದು ಕ್ಲಿಕ್ ಮಾಡಿದರೆ ಸಾಕು ನೀವು ಆರ್ಡರ್ ಮಾಡಿದ ವಸ್ತು  ನಿಮ್ಮೆದುರಿಗೆ ಹಾಜರ್!.  ಸಾಫ್ಟ್ ಲೋಕ ಜನರು ಈ ಆನ್ - ಲೈನ್ ಶಾಪಿಂಗ್ ಗೆ ಅದೆಷ್ಟು ಅಂಟಿ  ಕೊಂಡು  ಬಿಟ್ಟಿದ್ದಾರೆ ಎಂದರೆ, ಮೊನ್ನೆ ನನ್ನ ಫ್ರೆಂಡ್ ಹೇಳುತ್ತಿದ್ದ;

“ ನನಗೇನು ಬೇಕೋ ಒಂದು ಲಿಸ್ಟ್ ಮಾಡಿಕೊಂಡು ವೀಕೆಂಡ್ ನಲ್ಲಿ ಒಂದರ್ಧ ಗಂಟೆ ಕೂತು ಬಿಟ್ಟರೆ ಸಾಕು, ಆರ್ಡರ್ ಮಾಡಿದ್ದೆಲ್ಲ ಮನೆಗೆ ಬಂದು ಬೀಳುತ್ತದೆ, ಯಾವನ್ರಿ  ಹೋಗ್ತಾನೆ? ಈ ಬೆಂಗಳೂರು ಟ್ರಾಫಿಕ್ ನಲ್ಲಿ ಹೊರಗಡೆ?”.

ಇನ್ನೊಬ್ಬ ಸ್ನೇಹಿತನಂತು ಒಂದು ಹೆಜ್ಜೆ ಮುಂದಕ್ಕೆ ಹೋಗಿ :

“ ಸೈಜ್ ಕರೆಕ್ಟ್ ಆಗಿ ಗೊತ್ತಿದ್ರೆ ‘ಅಂಡರ್ ವೇರ್’ ಸಹಿತ ಆನ್- ಲೈನ್ ನಲ್ಲಿ ಆರ್ಡರ್ ಮಾಡಬಹುದು. ನಾನಂತೂ ಇದನ್ನೇ ಮಾಡೋದು” ಅಂದಿದ್ದ.

ಇವತ್ತಿನ ಬೆಂಗಳೂರು  ಇಂಟರ್ನೆಟ್ ಮೇಲೆ ಎಸ್ಟೊಂದು ಡಿಪೆಂಡ್ ಆಗಿದೆ ಅಂದ್ರೆ, ನನ್ನ ಸ್ನೇಹಿತ ನೊಬ್ಬನ ಪಿ. ಜಿ ಅಲ್ಲಿ ಅವರಿಗೊಂದು ಸೌಲಭ್ಯವಿದೆ. ಅದೇನಂದರೆ, ಅವರು ತಮ್ಮ ರೂಂ ನಲ್ಲಿ ಕುತ್ಕೊಂಡು ರಾತ್ರಿ ಊಟಕ್ಕೆ ಯಾವ ಡಿಶ್ ಬೇಕು ಅಂತ ಕ್ಲಿಕ್ ಮಾಡಿದರೆ ಸಾಕು ಅವರ ರೂಂ ಗೆ ನೆ ಅಡುಗೆ ಬರುತ್ತದೆ. ತಿಂಗಳ ಕೊನೆಗೆ ಬಿಲ್ ಕಟ್ಟಿದರಾಯ್ತು.

ಸಾಫ್ಟ್ ಲೋಕದ ಬಹಳಷ್ಟು ಜನ ತಮ್ಮ  ಎಲೆಕ್ಟ್ರಿಸಿಟಿ ಬಿಲ್, ವಾಟರ್ ಬಿಲ್, ಪೋಸ್ಟ್ ಪೇಡ ಆಗಿದ್ದರೆ ಮೊಬೈಲ್ ಬಿಲ್, ಪ್ರಿ ಪೇಯ್ಡ್ ಆಗಿದ್ದರೆ ಮೊಬೈಲ್ ರಿಚಾರ್ಜ್, ಎಲ್. ಐ .ಸಿ , ಪ್ರತಿ ತಿಂಗಳ ಲೋನ್ ಗಳ EMI  ಕಂತುಗಳು, ಎಲ್ಲವನ್ನು ಆನ್ - ಲೈನ್ ಮೂಲಕವೇ ಪೇ ಮಾಡಿಬಿಡುತ್ತಾರೆ. ಇನ್ನು ಕೆಲವರು “ ನಾವು ಜೀವಂತ ಇರೋವರೆಗೂ ಈ ಬಿಲ್ ಗಳನ್ನ ಪ್ರತಿ ತಿಂಗಳು ಕಟ್ಟ ಬೇಕಾಗಿರುವುದರಿಂದ net banking ನಲ್ಲಿ ಪ್ರತಿ ತಿಂಗಳು standing instruction  ಕೊಟ್ಟು ಸಂಬಳ ಬಂದ  ತಕ್ಷಣವೇ  ತಾನೇ ಕಟ್ ಆಗುವ ರೀತಿಯಲ್ಲಿ ಮಾಡಿಬಿಟ್ಟಿ ರುತ್ತಾರೆ.

ಸಾಫ್ಟ್ ಲೋಕದ ಕಂಪೆನಿಗಳಲ್ಲಿರುವ ಪ್ರತಿಯೊಂದು ಪ್ರಾಜೆಕ್ಟ್ ಟೀಂನಲ್ಲೂ  ಆನ್ - ಲೈನ್ ಶಾಪಿಂಗ್ ಅನ್ನು ಕರತಲಾಮಲಕ ಮಾಡಿಕೊಂಡವರು ಒಬ್ಬರಾದರೂ ಇರುತ್ತಾರೆ. ಪ್ರಾಜೆಕ್ಟ್ ಟೀಂ ಮೂವಿ ಗೆ ಹೋಗಬೇಕಾದ್ರೆ ಇವರು ಚಕಾ- ಚಕ್ ಅಂತ ಯಾವ ಥಿಯೇಟರ್ ನಲ್ಲಿ ಯಾವ್ ಸಿನೆಮ ಇದೆ, ಟಿಕೆಟ್ ಚಾರ್ಜ್ ಎಷ್ಟು ಅಂತ ಎಲ್ಲ ಮಾಹಿತಿಯನ್ನು ಟೀಂ ಗೆ ಒದಗಿಸುತ್ತಾರೆ. ಟೀಂ ನವರು  ಒಂದು ದಿನದ ಔಟಿಂಗ್ ಹೋಗಬೇಕಾದ್ರು ಅವರು ನೋಡುವುದು ಇವರ ಮುಖವನ್ನೇ. ಯಾವ ಜಾಗಕ್ಕೆ ಹೋಗಬೇಕು, ಅದು ಬೆಂಗಳೂರಿನಿಂದ ಎಷ್ಟು ಕಿಲೋಮೀಟರು, ಅಲ್ಲಿ ರೂಂ ಬುಕಿಂಗ್ ಎಲ್ಲವನ್ನು ಈ  ಇಂಟರ್ನೆಟ್ ಪಂಟರು ಗಳು ಒದಗಿಸಿಬಿಡುತ್ತಾರೆ.  ಇಲ್ಲಿ ಒಂದು ವಿಶೇಷವೆಂದರೆ ಸಾಫ್ಟ್ ಲೋಕದ ಜನರು ಪ್ರತಿದಿನವೂ ಕಂಪ್ಯೂಟರ್ ನ ಮುಂದೆ ಕೂತರೂ  ಎಲ್ಲರಿಗೂ ಆನ್ - ಲೈನ್ ಹುಚ್ಚು ಇರುತ್ತದೆ ಅಂತ ಅಲ್ಲ. ಕೆಲವರಿಗಂತೂ ಇದರ ಬಗ್ಗೆ ಗಂಧ - ಗಾಳಿಯೂ ಇರುವುದಿಲ್ಲ.

ಎಲೆಕ್ಟ್ರಾನಿಕ್ಸ್ ಉಪಕರಣಗಳಾದ ಹ್ಯಾಂಡ್ ಫ್ರೀ, ಮೊಬೈಲ್,  ಸ್ಪೀಕರ್, ಟಿ .ವಿ ಇವೆಲ್ಲವನ್ನೂ ಆನ್ ಲೈನ್ ಆರ್ಡರ್ ಮಾಡುವುದು ಹೊಸದೇನಲ್ಲ. ಆದರೆ ತರಕಾರಿಯನ್ನು ಆನ್ - ಲೈನ್ ನಲ್ಲಿ ನೀವು ಆರ್ಡರ್ ಮಾಡಿ ಮನೆಗೆ ಡೆಲಿವರಿ ಮಾಡಿಸ್ಕೊಬಹುದು ಅಂತ ಗೊತ್ತಾ? ಅಷ್ಟೇ ಏಕೆ, ಪೆನ್ ನಿಂದ ಹಿಡಿದು, ಪುಸ್ತಕ, ಡೈರಿ, ಕುತ್ತಿಗೆಗೆ ಹಾಕಿ ಕೊಳ್ಳುವ ಟೈ ವರೆಗೂ ಆನ್ - ಲೈನ್ ನಲ್ಲಿ ಲಭ್ಯ.

ಇನ್ನು ಹೆಂಗಸರಿಗಂತೂ ಕೇಳುವುದೇ ಬೇಡ. ಇವರು ಮನೇಲಿ ಕೂತು ಆರ್ಡರ್ ಮಾಡಿ, ಗಂಡನ ಆಫೀಸಿನ ಅಡ್ರೆಸ್ಸ್ ಕೊಟ್ಟು ಬಿಡುತ್ತಾರೆ. ಪೆಚ್ಚು ಮೊರೆ ಹಾಕಿಕೊಂಡು ಗಂಡ ಅದಕ್ಕೆಲ್ಲ ದುಡ್ಡು ಕೊಟ್ಟು ಅದೆಲ್ಲವನ್ನು ಮನೆಗೆ ತಗೊಂಡು ಬರಲೇಬೇಕು.

ಇನ್ನು ಪುಸ್ತಕ ಪ್ರೇಮಿಗಳೂ ಸಹ ಆನ್ - ಲೈನ್ ನಲ್ಲಿ ಪುಸ್ತಕ ಆರ್ಡರ್ ಮಾಡುವುದರಲ್ಲೂ ಹಿಂದೆ ಬಿದ್ದಿಲ್ಲ. ಆದರೆ ಕನ್ನಡ ಪುಸ್ತಕಗಳಿಗೆ ಆನ್ - ಲೈನ್ ನಲ್ಲಿ ಎಷ್ಟು ಬೇಡಿಕೆಯಿದೆ ಅನ್ನುವುದು ಒಂದು ಪ್ರಶ್ನೆ.

ನೀವು ಯಾವುದೇ ಸಾಫ್ಟ್ ವೇರ್ ಕಂಪನಿ ಮುಂದೆ ಕೇವಲ ಒಂದು ದಿನ ನಿಂತು ನೋಡಿ , ನಿಮಗೆ ಗೊತ್ತಾಗುತ್ತದೆ,

“ಆನ್ - ಲೈನ್ ಕಂಪನಿ ಯ ಎಷ್ಟು ಜನ ತಮ್ಮ ಟೂ ವೀಲರ್ ಮೇಲೆ ನಿಂತು, ಕಿವಿಯಲ್ಲಿ ಹ್ಯಾಂಡ್ ಫ್ರೀ  ಸಿಗಿಸಿಕೊಂಡು  ಆರ್ಡರ್ ಮಾಡಿದವರಿಗೊಸ್ಕರ ಕಾಯುತ್ತಿರುತ್ತಾರೆ ಅಂತ”.

ಈ ವಾರದ ಬಿಲ್ಡ್ ಲೇಬಲ್ :  ಆನ್- ಲೈನ್ ನಲ್ಲಿ ಕೊಂಡು  ಕೊಳ್ಳುವಾಗ  ಮುಖ ಅರಳಿರುತ್ತದೆ, ಆದರೆ ತಿಂಗಳ ಕೊನೆಗೆ ಕ್ರೆಡಿಟ್ ಕಾರ್ಡ್ ಬಿಲ್ ಬಂದಾಗ ತಲೆ ಯೊಳಗೆ  ಅಷ್ಟು ಆಲೋಚನೆಗಳು ಗಿಮ್ ಅಂತ ತಿರುಗಿ  “ ಬೆಂಗಳೂರಿನ ಕೆ. ಆರ್. ಮಾರ್ಕೆಟ್ನಲ್ಲಿ  ಒಂದು ಕಡೆ ರಾಶಿಯಾಗಿ ಬಿದ್ದ ಕಸದಂತಾಗಿರುತ್ತದೆ”.  

ಅಂಕಣ ೧೦: ಸಾಫ್ಟ್ ಲೋಕದಿಂದ ವೈರಾಗ್ಯದತ್ತ

ಸಾಫ್ಟ್ ಲೋಕವೆಂದರೆ ಕೈ ತುಂಬಾ ಸಂಬಳವೆನ್ನುವುದು ಎಲ್ಲರಿಗೂ ಗೊತ್ತಿದ್ದ ವಿಷಯವೇ. ಅದಿರಲಿ, ನಮಗೆ ಇಷ್ಟೊಂದು ಸಂಬಳ ಯಾಕೆ ಸಿಗುತ್ತದೆ ಗೊತ್ತಾ ? ನಾವು ಕೆಲಸ ಮಾಡುವ ಸಂಸ್ಥೆಗಳು ಕ್ಲೈಂಟ್ ಗಳಿಗೆ ಡಾಲರ್ ಲೆಕ್ಕದಲ್ಲಿ ಅಥವಾ ಕ್ಲೈಂಟ್ ದೇಶದ ಕರೆನ್ಸಿ ತಕ್ಕಂತೆ ಚಾರ್ಜ್ ಮಾಡುವುದರಿಂದ ನಮಗೆ ಅದು ರುಪಾಯಿಗೆ ಕನ್ವರ್ಟ್ ಆಗಿ ಇಷ್ಟು ಸಂಬಳ ಬರುತ್ತದೆ. ಆದರೆ ನೀವು ಒಂದು ಗಮನಿಸಿ, ಇತ್ತೀಚಿನ ದಿನಗಳಲ್ಲಿ 6th pay, 7th pay commision ಗಳಿಂದ  ಕೇಂದ್ರ ಮತ್ತು ರಾಜ್ಯ ಸರ್ಕಾರಿ ನೌಕರಿಗಳ ಸಂಬಳಗಳು  ಹೆಚ್ಚು ಕಡಿಮೆ ಸಾಫ್ಟ್ ಲೋಕದ ಹತ್ತಿರಕ್ಕೆ ಬರುತ್ತಿವೆ. ಹೀಗಾಗಿ ನಾವು ತೆಗೆದುಕೊಳ್ಳುವ ಸಂಬಳ ಅಷ್ಟೊಂದು ಮಹತ್ವದ್ದು ಏನು ಅಲ್ಲ ಬಿಡಿ. ಆದರೂ ಅದೇನೋ ಒಂದು ಕಲ್ಪನೆ ನಮ್ಮ ಜನಕ್ಕೆ, ಸಾಫ್ಟ್ ಲೋಕದವರು ಅಂದರೆ “ಇವರಿಗೆ ರೋಕ್ಕಕ್ಕೆನು ಕಡಿಮೆ ಇಲ್ಲ “ ಅಂತ.

ಒಂದು ಪ್ರಶ್ನೆ, “ ತಿಂಗಳಿಗೆ ಆರಂಕಿಯ ಸಂಬಳ ಎಣಿಸುವ ಸಾಫ್ಟ್ ಲೋಕದ ಜನ, ಇದ್ದಕ್ಕಿದ್ದಂತೆಯೇ ತಮ್ಮ ಕೆಲಸಕ್ಕೆ ಗುಡ್ ಬೈ ಹೇಳಿ, ಬೇರೆ ಏನೇನೋ ಸಾಹಸ ಗಳನ್ನೂ ಮಾಡಲು ಹೋಗುತ್ತಾರೆ ಅಂದ್ರೆ ನೀವು ನಂಬುತ್ತೀರಾ?”

ಖಂಡಿತ ನಂಬಲೇಬೇಕು! ಈ ವಾರ ಸ್ವಲ್ಪ ಇಂಥವರ ಬಗ್ಗೆ ಮಾತಾಡೋಣ.

ಸಾಫ್ಟ್ ಲೋಕದಲ್ಲಿ ನೀವು ಈ ರೀತಿಯ ವಿಚಿತ್ರಗಳನ್ನು ಜಾಸ್ತಿ ಕಾಣಬಹುದು. ಎ. ಸಿ ರೂಂ ನಲ್ಲಿ ಕೂತು ಕೂತು ಬೇಜಾರಾಗಿ, ಇದ್ದಕ್ಕಿದ್ದಂತೆಯೇ ಒಂದು ದಿನ, “ ಅರೆ, ಎತ್ಲಾ ಕಡೆ ಹೋಗ್ತಾ ಇದೆ ನಂ ಜೀವನ?” ಅನ್ನುವ ಒಂದು ಪ್ರಶ್ನೆ ಕಾಡ  ತೊಡಗಿದಾಗ..

“ ಇಷ್ಟು ದಿವಸ, ಬದುಕುವದಕ್ಕೊಸ್ಕರ  ಕೆಲಸ ಮಾಡಿದ್ದು ಸಾಕು, ಇನ್ನು ನಮ್ಮ ಮನಸಿಗೆ ತೃಪ್ತಿ ನೀಡುವ ಕೆಲಸವಾದರೂ ಮಾಡೋಣ” ಅಂತ  ಕೆಲಸಕ್ಕೆ ಗುಡ್ ಬೈ  ಹೇಳಿ ಹೊರಟೆ ಬಿಡುತ್ತಾರೆ ಕೆಲವರು.

ಕೋಡಿಂಗ್ ಬಿಟ್ಟು ಕ್ಯಾಮರಾ ಹಿಡಿದು ಕಾಡಿಗೆ ಹೊರಟವರು, ಟೆಸ್ಟಿಂಗ್ ಬಿಟ್ಟು ಟೂರಿಸಂ ನತ್ತ  ವಾಲಿದವರು, 
ಕ್ವಾಲಿಟಿ ಬಿಟ್ಟು ಕನ್ನಡ ದತ್ತ ಮುಖ ಮಾಡಿದವರು, ಮ್ಯಾನೇಜರ್ ಹುದ್ದೆಯನ್ನ ಕೆಳಗಿಟ್ಟು ಆಧ್ಯಾತ್ಮದತ್ತ  ಓಡಿದವರು, 
ಬೈಕ್ ಹತ್ತಿ ದೇಶ ಸುತ್ತಲು ಹೋದವರು, ಜೇಬಿನಲ್ಲಿ ಒಂದು ರೂಪಾಯಿಯೂ ಇಟ್ಟು ಕೊಳ್ಳದೆ ಪ್ರವಾಸ ಮಾಡುವವರು, 
ಅಷ್ಟೇ ಯಾಕೆ :

ಸಾಫ್ಟ್ ಲೋಕ ಬಿಟ್ಟು ಬಣ್ಣದ ಲೋಕಕ್ಕೆ ಕಾಲಿಟ್ಟವರು, ಕೋಡಿಂಗ್ ಬರೆಯುವ ಕೈಯಲ್ಲಿ ಅಂಕಣ ಬರೆಯಲು ಹೋದವರು ಮತ್ತು ಬರೆಯುತ್ತಲೇ ಇರುವವರು, ತಮ್ಮದೇ ಆದ ಸಂಸ್ಥೆ ಗಳನ್ನು ಸ್ಥಾಪಿಸಿ ಕೊಂಡವರು , ತಮ್ಮ ಸಂಸ್ಥೆಯಿಂದ ಸಾಮಾಜಿಕ ಕೆಲಸಗಳನ್ನು ಮಾಡುತ್ತಿರುವವರು, ಕೃಷಿ ಯತ್ತ ಮುಖ ಮಾಡಿದವರು, ಸಾಫ್ಟ್  ಆದ ಲೋಕವನ್ನು ಬಿಟ್ಟು  ಸಮಾಜ ಸೇವೆಗಾಗಿ ಸಿವಿಲ್ ಸರ್ವಿಸ್ ಜಾಬ್ ಗಳನ್ನೂ ಅರಸಿಕೊಂಡು ಹೋದವರು, ಸಾಫ್ಟ್ ಸಹವಾಸವೇ ಸಾಕೆಂದು ಜೀವನಕ್ಕೊಸ್ಕರ ಸರಕಾರೀ ಕೆಲಸಕ್ಕೆ ಬೇಕಂತಲೇ ಸೇರಿಕೊಂಡವರು..... , ಹೀಗೆ ಹಲವಾರು ಉದಾಹರಣೆ ಗಳನ್ನ ನೋಡ ಬಹುದು. ಮಾಡುವ ಕೆಲಸ ತೃಪ್ತಿ ಕೊಡದೆ ಇದ್ದಾಗ ತಮಗಿಷ್ಟ ವಾದ ಕೆಲಸಗಳನ್ನು ಹುಡುಕಿಕೊಂಡು ಹೋಗುವುದು ಸಾಫ್ಟ್ ಲೋಕದಲ್ಲಿ ಇನ್ನು ಚಾಲ್ತಿಯಲ್ಲಿದೆ.

ಇದೆ ತರಹದ ಇನ್ನೊಂದು ರೀತಿಯ ಗುಂಪು ಇದೆ. ಅವರು ಸಾಫ್ಟ್ ಲೋಕವನ್ನು ಪೂರ್ತಿಯಾಗಿ ಬಿಟ್ಟು ಬರದೆ ಇದ್ದರೂ, ತಮ್ಮ ಒಲವಿನ ವಿಷಯಕ್ಕೆ ವಾರಾಂತ್ಯವನ್ನು ಮೀಸಲಿಡುತ್ತಾರೆ. ಅದು ಸಂಗೀತ, ಬರವಣಿಗೆ, ನಾಟಕ, ಭರತನಾಟ್ಯ, ಮಕ್ಕಳಿಗೆ ಪಾಠ ಹೇಳುವುದು, ತಮ್ಮದೇ ಆದ ವೆಬ್ ಸೈಟ್ ಓಪನ್ ಮಾಡಿ ಅಲ್ಲಿ ಟ್ರೆಕಿಂಗ್, ಟೂರಿಸ್ಟ್ ಪ್ಲೇಸ್ ಗಳ ಬಗ್ಗೆ ಇತರರಿಗೆ ಮಾಹಿತಿ ನೀಡುವಂತಹ ಅಂಕಣಗಳನ್ನು ಬರೆಯುವುದು.  ವಿಶೇಷವೆಂದರೆ ಮಾಡುವ ಕೆಲಸ ಸಾಫ್ಟ್ ವೇರ್ ನಲ್ಲಾದರೂ,  ಮುಕ್ತ ವಿಶ್ವ ವಿದ್ಯಾ ನಿಲಯಗಳಲ್ಲಿ ಕನ್ನಡ ಬಿ.ಎ ಮತ್ತು ಎಮ್.ಎ ಗಳನ್ನೂ ಓದುತ್ತಿರುವವರೂ ಇದ್ದಾರೆ. ಹೇಗಿದ್ದರೂ ನಾವು ಸಾವಿರಾರು ವರ್ಷ ಬದುಕುವದಿಲ್ಲ ವಾದ್ದರಿಂದ, ಬರೀ ಹಣದ ಹಿಂದೆ ಹೋಗುವ ಬದಲು, ಒಂದಿಷ್ಟು ಬೇಸಿಕ್ ನೀಡ್ ಗಳನ್ನ ಪೂರೈಸಿಕೊಂಡು, ತಮಗೆ ಇಷ್ಟವಾದ ಕೆಲಸಗಳಿಗೆ ಸಮಯ ಮೀಸಲಿಡುವವರು ಸಾಫ್ಟ್ ಲೋಕದಲ್ಲಿ ಸಿಗುತ್ತಾರೆ. ಹಾಗಂತ ಎಲ್ಲ ಸಾಫ್ಟ್ ಜನರು ಹೀಗೆಯೇ ಇರುತ್ತಾರೆ ಅಂತ ಅಲ್ಲ. ಒಂದಿಷ್ಟು ಜನರು ಮಾತ್ರ ಈ ಗುಂಪಿಗೆ ಸೇರುತ್ತಾರೆ.

ಒಂದು ಸಲ ಇರುವ ಕೆಲಸವನ್ನು ಕಳೆದುಕೊಂಡರೆ ಮತ್ತೆ ಸಿಗುತ್ತದೋ ಇಲ್ಲವೋ ಎಂಬ ಭಯದಿಂದ ಬದುಕುವವರು ಬಹಳ ಮಂದಿ. ಆದರೆ ಆತ್ಮ ತೃಪ್ತಿ ಗಾಗಿ ಇರುವ ಕೆಲಸವನ್ನು ಬಿಟ್ಟು ಕನಸಿನ ಬೆನ್ನೇರಿ ಹೋಗುವ ಇವರ ಧೈರ್ಯವನ್ನು ಮೆಚ್ಚಲೇಬೇಕು. ಈ ವಾರದ ಬಿಲ್ಡ್ ಲೇಬಲ್ : ಸಾಫ್ಟ್ ಲೋಕದ ಜನರು ಸಿವಿಲ್ ಸರ್ವಿಸ್ ಗೆ ವಲಸೆ ಹೋಗುತ್ತಿರುವುದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಆದರೆ ಇತ್ತೀಚಿನ ದಿನಗಳಲ್ಲಿ ಸಾಫ್ಟ್ ಜನರು “ಪಾಲಿಟಿಕ್ಸ್ “ ನ ಕಡೆಗೆ ಇಂಟರೆಸ್ಟ್ ತೋರಿಸ್ತಾ ಇರುವುದು ಒಂದು ಹೊಸ ಬೆಳವಣಿಗೆ. ಇದು ಒಳ್ಳೆಯದೋ, ಕೆಟ್ಟದ್ದೋ ಎಂದು ಅವರ ಪಾಲಿಟಿಕ್ಸ್ ಜೀವನ ಶುರುವಾದ ಮೇಲೆ ಹೇಳಬಹುದು.

ಅಂಕಣ ೯ : ಸಾಫ್ಟ್ ಲೋಕ ಮತ್ತು ಫೇಸ್ ಬುಕ್

ಫೇಸ್ ಬುಕ್, ಈ ಪದ ಸಾಫ್ಟ್ ಲೋಕ ಬಿಡಿ, ಬೇರೆ ಎಲ್ಲ ಲೋಕದ ಯುವಕ ಯುವತಿಯರಿಗೆ ಮತ್ತು ಎಲ್ಲ ವಯೋಮಾನದವರಿಗೂ ಚಿರಪರಿಚಿತ. ಬಹುಶ ಇವತ್ತಿನ ಜನರೇಶನ್ ಅಲ್ಲಿ ಯಾರಾದರು ಫೇಸ್ ಬುಕ್  ಅಕೌಂಟ್ ಇಲ್ಲ ಅಂದ್ರೆ ಅವನನ್ನ / ಅವಳನ್ನ ಕೆಕ್ಕರಿಸಿ ನೋಡುವ ಜನರೇ ಜಾಸ್ತಿ. ಸಾಫ್ಟ್ ಲೋಕದಲ್ಲೂ ಸಹ ಇದರ ಬಗ್ಗೆ ಹುಚ್ಚು ಹಿಡಿಸಿಕೊಂಡವರೇನು ಕಡಿಮೆ ಯಿಲ್ಲ. ಕೂತರೂ, ನಿಂತರೂ, ಯಾವಾಗಲು ಇವರಿಗೆ ತಮಗಿಂತ ತಮ್ಮ ಪ್ರೊಫೈಲ್ ಬಗ್ಗೆಯೇ ಚಿಂತೆ ಜಾಸ್ತಿ. ಒಂದು ಕಾಲದಲ್ಲಿ ಮೊಬೈಲ್ ಬಂದು ಎಲ್ಲರನ್ನು ಹುಚ್ಚು ಹಿಡಿಸಿದ ಹಾಗೆ ಇವಾಗ ಇದು ಫೇಸ್ ಬುಕ್ ಬಂದು ಎಲ್ಲರನ್ನು ತಲೆ ಕೆರೆದುಕೊಳ್ಳುವಂತೆ ಮಾಡಿದೆ.

ಸಾಫ್ಟ್ ಲೋಕ ಮತ್ತು ಫೇಸ್ ಬುಕ್ ಇವೆರಡು ಅಷ್ಟು ದೂರದ ಸಂಭಂದಿ ಗಳೆನಲ್ಲ. ಹೆಚ್ಚು ಕಡಿಮೆ ಆನ್-ಲೈನ್ ನಲ್ಲಿ ಇರೋರೆಲ್ಲ ಅವಾಗಾವಾಗ ತಮ್ಮ ಪ್ರೊಫೈಲ್ ನ ಇಣುಕಿ ನೋಡುತ್ತಿರುತ್ತಾರೆ. ಕೆಲವರಂತೂ ಇನ್ನೇನು ಮೀಟಿಂಗ್ ಹೊರಡುವಾಗ, ಮೀಟಿಂಗ್ ಯಿಂದ ಬಂದ  ಮೇಲೆ, ಸೆಮಿನಾರ್ ಗೆ ಹೋಗುವಾಗ, ಸೆಮಿನಾರ್ ಮುಗಿದ ಮೇಲೆ, ಹೀಗೆ ಪ್ರತಿಯೊಂದು ಅಪ್ - ಡೆಟ್  ಅನ್ನು ಮಾಡುತ್ತಲೇ ಇರುತ್ತಾರೆ.  ಫೇಸ್ ಬುಕ್  ನಲ್ಲಿ ಅವರಿಗೆ ತಾವು ಏನು ಅಪ್-ಡೇಟ್  ಮಾಡುತ್ತೀವಿ  ಅನ್ನೋದಕ್ಕಿಂತ ಎಷ್ಟು ಜನ ಅದನ್ನ ಲೈಕ್ ಮಾಡಬಹುದು, ಎಷ್ಟು ಜನ ಅದಕ್ಕೆ ಕಾಮೆಂಟ್ ಬರಿಬಹುದು ಅನ್ನೋ ಲೆಕ್ಕಾಚಾರದಲ್ಲೇ ಮುಳುಗಿರುತ್ತಾರೆ.

ಅದರಲ್ಲೂ ಸಾಫ್ಟ್ ಲೋಕದ ಹುಡುಗಿಯರು ಫೇಸ್ ಬುಕ್  ಅನ್ನು use  ಮಾಡುವಲ್ಲಿ ಕಡಿಮೆ ಏನು ಬಿದ್ದಿಲ್ಲ. ಇನ್ನೊಂದು ಅರ್ಥದಲ್ಲಿ ಹುಡುಗರಿಗಿಂತ ಇವರು ಸ್ವಲ್ಪ ಜಾಸ್ತಿ ಯೆ  ತಮ್ಮ ಪ್ರೊಫೈಲ್ ಬಗ್ಗೆ ಕೇರ್ ತಗೋತಾರೆ. ಆಗ ತಾನೇ ಕಂಪನಿಯ cultural  ಕಾರ್ಯಕ್ರಮದಲ್ಲಿ  ತೆಗೆಸಿಕೊಂಡ ಅವರ ಫೋಟೋ ಕ್ಷಣಾರ್ಧ ದಲ್ಲಿಯೇ ಪ್ರೊಫೈಲ್ ಗೆ ಅಪ್-ಲೋಡ್ ಆಗಿರುತ್ತದೆ. ಮೊನ್ನೆ ನನ್ನ ಸ್ನೇಹಿತ  ತಮಾಷೆಗೆ ಹೇಳುತ್ತಿದ್ದ:

ಒಮ್ಮೆ ಹುಡುಗಿ ಯೊಬ್ಬಳು : “ತಲೆ ನೋವು ….from past 15 mins “ ಅಂತ  ಹಾಕಿದರೆ ಅದಕ್ಕೆ ಉತ್ತರವಾಗಿ  98 ಕಾಮೆಂಟ್ ಗಳು ಬಂದಿದ್ದವು ( ಅದರಲ್ಲಿ ಹೆಚ್ಚಿನವು ಹುಡುಗರಿಂದಲೇ  ಅಂತ ಬಿಡಿಸಿ ಹೇಳಬೇಕಾಗಿಲ್ಲ )

ಅದೇ ಹುಡುಗನೊಬ್ಬ:   “ನನಗೆ ಜೀವನ ಬೇಸರವಾಗಿದೆ..  shall i commit suicide?“  ಅಂತ ಹಾಕಿದರೆ 3 ಜನ ಅದಕ್ಕೂ ಲೈಕ್ ಮಾಡಿದ್ದರಂತೆ!

ಫೇಸ್ ಬುಕ್   ನಲ್ಲಿಯೂ ಸಹ ನಮ್ಮ ಹುಡುಗರನ್ನು ಕೇಳೋರಿಲ್ಲ !

ಸಾಫ್ಟ್ ಲೋಕದ ಜನ ವೀಕೆಂಡ್ ನಲ್ಲಿ ಟ್ರೆಕಿಂಗ್ ಹೋದಾಗ, ಇನ್ನೇನು ಆನ್ - ಸೈಟ್  ಹೊರುಡುವ ಸಮಯದಲ್ಲಿ ವಿಮಾನದಲ್ಲಿ ಕೂತಾಗ, ಬೇರೆ ದೇಶಕ್ಕೆ ಕಾಲಿಟ್ಟಾಗ, ಅಲ್ಲಿರುವ ಹೋಟೆಲಿನಲ್ಲಿ ತಮ್ಮ ಲಗ್ಗೇಜ್ ಇಟ್ಟಾಗ… ಎಲ್ಲವು ಕ್ಷಣಾರ್ಧ ದಲ್ಲೇ ಫೆಸ್ ಬುಕ್ ನಲ್ಲಿ ಅಪ್ - ಡೆಟ್  ಆಗಿರುತ್ತೆ.

ಆದರೆ ಒಂದು ವಿಷಯ, ಸಾಫ್ಟ್ ಲೋಕದ ಜನ ಫೆಸ್ ಬುಕ್ ಅನ್ನು  ಕೇವಲ ಶೋಕಿ ಗಾಗಿ ಮಾತ್ರ ಬಳಸುತ್ತಾರೆ ಅಂದರೆ ಅದು ಶುದ್ದ ತಪ್ಪು. ಅನೇಕ ಒಳ್ಳೆಯ ವಿಚಾರ ವಿನಿಮಯಗಳಿಗೂ ಈ ತಾಣಗಳನ್ನ ಬಳಸಿಕೊಳ್ಳುತ್ತಾರೆ. ಒಂದು ಸಾಮಾಜಿಕ ಕಾರ್ಯಕ್ಕಾಗಿ, ತಮ್ಮ ಕಂಪನಿ ಯ ಪ್ರೊಡಕ್ಟ್ ಗಳ ಮಾರ್ಕೆಟಿಂಗ್ ಗಾಗಿ, ತಾವು ನಡೆಸುವ ಎನ್. ಜಿ. ಓ ಸಂಸ್ಥೆಗಳ ಬಗ್ಗೆ ಬೇರೆಯವರಿಗೆ ತಿಳಿಸುವುದಕ್ಕಾಗಿ, ಅಷ್ಟೇ ಏಕೆ, ಕನ್ನಡ ಪರ ಕಾಳಜಿಗಾಗಿ ಯೂ ಸಹ  ಫೆಸ್ ಬುಕ್ ಅನ್ನು  ಕೆಲವರು ಬಳಸುವುದನ್ನು ನೋಡಿದಾಗ ತುಂಬಾ ಹೆಮ್ಮೆ ಎನಿಸುತ್ತದೆ.

ಫೇಸ್ - ಬುಕ್ ಗೂ ಸಾಫ್ಟ್ ಲೋಕಕ್ಕೂ ತುಂಬಾ ಘಾಡವಾದ ಸಂಭಂದವೇ ಇದೆ. ಅದನ್ನ ಇನ್ನೊಂದು ಅಂಕಣದಲ್ಲಿ ಸವಿಸ್ತಾರವಾಗಿ ಮುಂದೆ ಹೇಳುತ್ತೇನೆ. ಸದ್ಯಕ್ಕೆ ಇಷ್ಟು ಸಾಕು.

ಈ ವಾರದ ಬಿಲ್ಡ್ ಲೇಬಲ್:  

ಪ್ರಶ್ನೆ : ಫೇಸ್ - ಬುಕ್ ಯಾಕೆ ಎಲ್ಲರಿಗೂ ಅಷ್ಟು ಇಷ್ಟ?

ಉತ್ತರ : ಯಾಕಂದ್ರೆ ನಮ್ಮೆಲ್ಲರಿಗೂ ನಮ್ಮ ಜೀವನಕ್ಕಿಂತ ಬೇರೆ ಯವರ ಜೀವನದಲ್ಲಿ ಏನು ನಡೀತಾ ಇದೆ ಅಂತ ತಿಳ್ಕೊಳ್ಳೋ ಆಸಕ್ತಿ ಹೆಚ್ಚು!

ಅಂಕಣ ೮ : ಸಾಫ್ಟ್ ಲಾಜಿಕ್ ಇದೊಂಥರ ಮ್ಯಾಜಿಕ್

ಕೆಲವರಿರುತ್ತಾರೆ ಅವರಿಗೆ ಕೋಡಿಂಗ್ ಬಿಟ್ಟರೆ ಬೇರೆ ಜೀವನವೇ ಇಲ್ಲ ಎನ್ನುವಂತೆ. ಅವರಿಗೆ ಕೋಡಿಂಗ್ ಮೇಲೆ ಅದೆಷ್ಟು ಪ್ರೀತಿ ಎಂದರೆ, ಸಾಫ್ಟ್ ಲೋಕದ ಇತರ ವಿಭಾಗದ ಜನರೆಲ್ಲಾ (ಉದಾಹರಣೆಗೆ : ಟೆಸ್ಟಿಂಗ್, ಕ್ವಾಲಿಟಿ, ಮ್ಯಾನೇಜ್ಮೆಂಟ್ ) ಇವರಿಗೊಂದು  ಥರ ಅಸಡ್ಡೆ. ಈ ಕೋಡ್ ದಿಗ್ಗಜರಿಗೆ ತಮ್ಮ ಕೆಲಸವೇ  ಯಾವತ್ತಿಗೂ ಶ್ರೇಷ್ಠ ಎನ್ನುವ ಭಾವನೆ.  ಹಾಗೇನೆ ತಮ್ಮ ಕೆಲಸದ ಮೇಲೆ ಅವರಿಗೆ ಅತೀವ ವಾದ ಅಭಿಮಾನ ಸಹ.

ಇವರಲ್ಲಿ ವಿಶೇಷವಾಗಿ ಒಂದಿಷ್ಟು ಜನ ಯಾವಾಗಲೂ ಲಾಜಿಕ್ ನಲ್ಲಿ  ಮುಳುಗಿ ಹೋಗಿರುತ್ತಾರೆ. ಇಂತಹವರು ಪಿಚ್ಚರ್ ಗೆ ಹೋದರೆ ಥಿಯೇಟರ್ ನಲ್ಲಿರೋರೆಲ್ಲರೂ ಸಿನೆಮಾನ ಆನಂದಿಸುತ್ತಿದ್ದಾರೆ ಇವರು ಆ ಕಥೆಯನ್ನ ತಮ್ಮದೇ ಆದ ಲಾಜಿಕ್ ನಿಂದ ಆಲೋಚಿಸುತ್ತಾರೆ. ಅವರ ಪ್ರಕಾರ ಅದು ತಪ್ಪಾದರೆ, ಥಿಯೇಟರ್ ನಿಂದ ಹೊರಕ್ಕೆ ಬಂದೆ ಬಿಡುತ್ತಾರೆ.  ಯಾವನಾದರೂ ಒಂದು ಜೋಕು ಹೇಳಿದರೆ ಅದು ಎಷ್ಟು ಪ್ರಾಕ್ಟಿಕಲ್ ಅಂತ ಆಲೋಚಿಸುತ್ತಾರೆ. ಇವರು ಎಲ್ಲರಲ್ಲಿಯೂ, ಎಲ್ಲದರಲ್ಲಿಯೂ ಏನನ್ನೋ ಹುಡುಕುತ್ತಿರುತ್ತಾರೆ ( ತಮ್ಮ ಲಾಜಿಕ್ ನ ಸಹಾಯ ದಿಂದ). ಇವರಿಗೆ ಪಜಲ್ ಗಳು, ಯಾವಾಗಲು ತಾರ್ಕಿಕವಾಗಿ ಕೊನೆಗೊಳ್ಳುವ ವಿಷಯಗಳು ತುಂಬಾ ಇಷ್ಟ.  ಕೆಲವೊಂದು ಸಲ ಇವರ "ಸೆನ್ಸ್ ಆಫ್ ಹುಮರ್" ಸಹ ಅಷ್ಟೇ ಚೆನ್ನಾಗಿ ಇರುತ್ತದೆ.

ಇವರಿಗೆ ದಿನ ಪತ್ರಿಕೆಯಲ್ಲಿ ಬರುವ ಸುಡೋಕು ಮೇಲೆ ಎಲ್ಲಿಲ್ಲದ ಆಸಕ್ತಿ. ಹಾಗೇನೆ, ತಮ್ಮ ಬಿಡುವಿನ ವೇಳೆಯಲ್ಲೂ ಇವರು .Net, C++, Csharp, PHP, Python ಮುಂತಾದವುಗಳ ಬಗ್ಗೆ ಬಹಳ ಆಸಕ್ತಿಯಿಂದ ಓದುತ್ತಿರುತ್ತಾರೆ. ಇಂಗ್ಲಿಷ್ ಚಿತ್ರಗಳಲ್ಲಿ ತುಂಬಾ ಆಸಕ್ತಿ ಹೊಂದಿರುವ ಇವರು, ಲಾಜಿಕ್ ಇರುವ ಯಾವುದೇ ವಿಷಯಕ್ಕೆ ಇವರು ಸಂಪೂರ್ಣ ಬೆಂಬಲ ಕೊಡುತ್ತಾರೆ. ಇಷ್ಟೆಲ್ಲಾ ಹೇಳಿದ ಮೇಲೆ, ಕೋಡ್ ಮಾಡುವುದರಲ್ಲಿ ಇವರು “ಪಂಟ್ರು” ಅಂತ ಬೇರೆ ಹೇಳಬೇಕಾಗಿಲ್ಲ ತಾನೇ? ಇಂತಹ ಲಾಜಿಕ ಜನರ ತಮಾಷೆಯಾಗಿರುವ ಘಟನೆಗಳನ್ನ ನೋಡೋಣ ಬನ್ನಿ:

ಮೊನ್ನೆ ನನ್ನ ಗೆಳೆಯನೊಬ್ಬ ( ಗೆಳೆಯ ನಂಬರ್ ೧ ಅಂದುಕೊಳ್ಳೋಣ) ಫೇಸ್ ಬುಕ್ ನಲ್ಲಿ ಎಲ್ಲರಿಗೂ ಆಪತ್ತಿನಲ್ಲಿ ಅನುಕೂಲವಾಗಲಿ ಅಂತ ಒಂದು ಮೆಸೇಜು ಹಾಕಿದ್ದ : :

“ ನೀವು ಎ ಟಿ ಎಂ ನಲ್ಲಿ ದುಡ್ಡು ತೆಗೆದುಕೊಳ್ಳುವಾಗ, ಯಾರಾದರು ಕಳ್ಳ ಬಂದು ನಿಮಗೆ ಚಾಕು ತೋರಿಸಿ ಹೆದರಿಸಿದರೆ ನೀವು ತಕ್ಷಣ ನಿಮ್ಮ ಪಿನ್ ಅನ್ನು “ಉಲ್ಟಾ” ಎಂಟರ್ ಮಾಡಿ (ಅಂದರೆ ನಿಮ್ಮ ಪಿನ್ ೧೨೩೪ ಇದ್ದಾರೆ ೪೩೨೧ ಎಂಟರ್ ಮಾಡಿ), ಅವಾಗ ದುಡ್ಡು ಬರುವುದಿಲ್ಲ ಮತ್ತು ಪೊಲೀಸರಿಗೆ ಮೆಸೇಜ್ ಹೋಗುತ್ತದೆ”

ಅದಕ್ಕೆ ನನ್ನ ಇನ್ನೊಬ್ಬ ಗೆಳೆಯ ನಂಬರ್ ೨ ( logic category ಗೆ ಸೇರಿದ) ಕೆಳಗಡೆ ಕಾಮೆಂಟ್ ಬರೆದಿದ್ದ:

“what if my ATM pin is palindrome like 1221? “

ಅದಕ್ಕೆ ಉತ್ತರವಾಗಿ ನನ್ನ ಗೆಳೆಯ ನಂಬರ್ ೧ ಬರೆದಿದ್ದ: “ ಹಾಗಿದ್ರೆ, ಕಳ್ಳನ ಕೈಯಲ್ಲಿ ಚೆನ್ನಾಗಿ ಒದೆ ತಿನ್ನು!” ಅಂತ.

                                

ಎಲ್ಲಾದರೂ ಒಂದು ಕಡೆ : “ Warning: Smoking is not allowed”  ಅಂತ ಬರೆದಿದ್ದರೆ,

ಇವರು ಅಲ್ಲೇ ಸ್ಮೋಕ್ ಮಾಡಿ “I am an engineer, i care about only “ errors” not “warnings”!” ಅಂತ  ಹೇಳಿ ಒಂದು ನಗು ಬೀರುತ್ತಾರೆ.

ಇಂತಹ ಹೇಳಿಕೆಗೆ ಏನು ಉತ್ತರ ಕೊಡುತ್ತೀರಿ?

                               

ಈ ಥರ ಮೀಟಿಂಗ್ ರೂಂ ನಲ್ಲಿ ಸಹ ಪೆದ್ದು - ಪೆದ್ದಾದ ಲಾಜಿಕ್ ನಿಂದ ತಮ್ಮ ಮ್ಯಾನೇಜರ್ ನ್ನೇ ಗಲಿಬಿಲಿಗೊಳಿಸಿ ಬಿಡುತ್ತಾರೆ,

ಆದರೆ ಮ್ಯಾನೇಜರ್ ಮಾತ್ರ ಯಥಾ ಪ್ರಕಾರ “its a very good question, but now lets focus on our actual issue “ ಅಂತ ತಮ್ಮ ಜಾಣ್ಮೆ ಮೆರೆದಿರುತ್ತಾರೆ.  

ಇವರ ಲಾಜಿಕ್ ಪ್ರಕಾರ:

೧.  ಒಂದೇ ಸಲಕ್ಕೆ ಒಂದು ಟೀ ತೆಗೆದುಕೊಳ್ಳುವ ಬದಲಿಗೆ, ಒಬ್ಬರೇ ಇದ್ದರೂ ಟೀ ನ ಬೈ- ಟು ತಗೊಂಡ್ರೆ ಜಾಸ್ತಿ ಬರುತ್ತದಲ್ಲ?

೨.  ಮೂರು ತಾಸು ಸಿನಿಮಾ ವನ್ನ ಒಂದು ಗಂಟೆಗೆ ಇಳಿಸಿ, ಕೇವಲ ಕಥೆಗೆ ಮುಖ್ಯವಾದ ಸನ್ನಿವೇಶವನ್ನೇ ನೋಡಬಹುದಲ್ಲ?

೩. ಬೆಂಗಳೂರಿನಲ್ಲಿ ನಾನೊಂದು ಸೈಟು ತಗೊಂಡು (ಉದಾಹರಣೆಗೆ : ೩೦ x ೪೦) , ಅದಿಷ್ಟು ಜಾಗಕ್ಕೆ ನಾನೇ ಒಡೆಯ ಅಂದರೆ, ಅದೇ ಸ್ಥಾನದಲ್ಲಿ ಭೂಮಿಯ ಇನ್ನೊಂದು ಭಾಗದಲ್ಲಿ (ದುಂಡಗಿರುವ ಭೂಮಿಯನ್ನು ತಿರುಗಿಸಿದಾಗ)  ಬರುವ ಜಾಗವೂ  ನನ್ನದೇ ತಾನೇ?  ಅಂದರೆ ಆ ಭಾಗ ಇನ್ನೊಂದು ದೇಶದಲ್ಲಿದ್ದರೆ ಅದು ಕೂಡ  (೩೦ x ೪೦) ನಂದೇ ತಾನೇ?

ಇಂತಹ ಪ್ರಶ್ನೆಗೆ ಆ ಭಗವಂತ ನೆ ಉತ್ತರ ಕೊಡಬೇಕು.

ಈ ವಾರದ ಬಿಲ್ಡ್ ಲೇಬಲ್ :  ಎಲ್ಲವನ್ನು ಲಾಜಿಕ್ಕಿನಿಂದಲೇ ಅಳೆಯುವ ಇವರು ನಮ್ಮ ತಿಂಗಳ  ಸ್ಯಾಲರಿ ಮತ್ತು ತಿಂಗಳ ಖರ್ಚು ಯಾಕೆ ಯಾವಾಗಲು ಹೊಂದಾಣಿಕೆ ಯಾಗುತ್ತಿಲ್ಲ ಅನ್ನುವ ಎಷ್ಟೋ ಜನರ ಪ್ರಶ್ನೆಗೆ ಲಾಜಿಕ್  ಕಂಡು ಹಿಡಿದರೆ ಜಗತ್ತಿ ಗಾದರೂ ಸ್ವಲ್ಪ ಸಹಾಯ ಮಾಡಿದ ಹಾಗೆ ಇರುತ್ತದೆ.

ಅಂಕಣ ೭ : ಸಾಫ್ಟ್ ಲೋಕ ಮತ್ತು ಲೋಕ ಜ್ಞಾನ

“ಅವಕ್ಕೇನು ಗೊತ್ತು ಲೋಕಜ್ಞಾನ? ಬರೀ ಮೂರು ಹೊತ್ತು ಕಂಪ್ಯೂಟರ್ ನ ಮುಂದೆ ಕೂತು ಕೆಲಸ ಮಾಡೋದು ಒಂದೇ ಅವರ ಕಾರ್ಯ. ಜಗತ್ತಿನ ಆಗು ಹೋಗು ಗಳ ಬಗ್ಗೆ ಅವರಿಗೇನು ಅಷ್ಟು ಸಂಭಂದ ವಿರುವುದಿಲ್ಲ. ಈ ಸಾಫ್ಟ್ ವೇರ್ ಎಂಜಿನೀಯರ್ಸ್ ಇದಾರಲ್ಲ ಅವರು ಕೇವಲ ತಮ್ಮಷ್ಟಕ್ಕೆ ತಾವು ಮಾತ್ರ…. “  ಈ ತರಹದ ಮಾತುಗಳು ಹಲವಾರು ಬಾರಿ ಹಲವಾರು ಜನರ ಬಾಯಿಂದ ಕೇಳಿರುತ್ತೇವೆ. ನಿಜ, ಅವರು ಹೇಳಿದ ಹಾಗೆ ನಾವು ಮೂರು ಹೊತ್ತು ಕಂಪ್ಯೂಟರ್ ನ ಮುಂದೆ ಕೂತು ಕೆಲಸ ಮಾಡುತ್ತಿರಬಹುದು, ಆದರೆ …. ಜಗತ್ತಿನ ಆಗು ಹೋಗು ಗಳ ಬಗ್ಗೆ ನಮಗೆ ಸಂಭಂದವಿಲ್ಲಾ ಎನ್ನುವ ಮಾತು ಇದೆಯಲ್ಲ ಇದು ಸ್ವಲ್ಪ ಕಷ್ಟದ ವಿಷಯ. ಎಲ್ಲೋ ಕೆಲವೊಬ್ಬರು ಇರಬಹುದು, ಹಾಗಂತ ಇಡೀ ಸಾಫ್ಟ್ ಸಮುದಾಯವೇ ಹೀಗೆ ಇರುತ್ತದೆ ಅಂತ ನಿರ್ಣಯಕ್ಕೆ ಬಂದು ಬಿಡುವುದು ತಪ್ಪು!

ನಮ್ಮಲ್ಲೂ ಬಹಳಷ್ಟು ಜನ ತಮ್ಮ ಬಿಡುವಿನ ಅನೇಕ ಸಮಾಜ ಮುಖಿ ಕೆಲಸಗಳನ್ನು ಮಾಡುವವರಿದ್ದಾರೆ. ಪ್ರತಿ ಶನಿವಾರ ತಮ್ಮ ಮನೆಯ ಅಕ್ಕ ಪಕ್ಕ ಇರುವ ಸರಕಾರೀ ಶಾಲೆಗಳಿಗೆ ಹೋಗಿ ಒಂದಿಷ್ಟು ಪಾಠ ಮಾಡಿ ಬರುವವರು, ಎನ್. ಜಿ . ಓ ಅಂತಹ ಸಂಸ್ಥೆ ಗಳನ್ನೂ ಸ್ಥಾಪಿಸಿಕೊಂಡು ವಾರಾಂತ್ಯದಲ್ಲಿ ಹಳ್ಳಿಗಳಿಗೆ ಹೋಗಿ ಒಂದುಷ್ಟು ಸಮಾಜ ಮುಖಿ ಕೆಲಸ ಮಾಡುವವರು, ಕೆಲಸ ಹುಡುಕಿಕೊಂಡು ಬರುವವರಿಗೆ ಅಲ್ಲಿ - ಇಲ್ಲಿ ತಮಗೆ ಗೊತ್ತಿರುವ ಕಡೆಗೆ ಕೆಲಸ ಕೊಡಿಸುವವರು, ವಾರಾಂತ್ಯದಲ್ಲಿ ಕನ್ನಡೇತರರಿಗೆ ಕನ್ನಡ ಪಾಠ ಹೇಳುವವರು, ತಮಗೆ ಬರುವ ಸಂಬಳದ ಒಂದಿಷ್ಟು ಭಾಗ ಅನಾಥಾಶ್ರಮಕ್ಕೋ, ಶಾಲೆ ಗಳಿಗೋ, ಅಥವಾ ಅವಶ್ಯಕತೆ ಇರುವ ವಿಧ್ಯಾರ್ಥಿಗಳಿಗೆ ಕೊಡುವವರು, ಹಲವಾರು ಶಾಲೆಗಳಿಗೆ ಕಂಪ್ಯೂಟರ್ ಮತ್ತು ಇತರ ಉಪಕರಣ ಗಳನ್ನ ಕೊಡಿಸುವವರು, ಕರ ಕುಶಲ ವಸ್ತುಗಳನ್ನು ತಯಾರಿಸುವವರಿಗೆ ತಮ್ಮ ಕಂಪನಿ ಯಲ್ಲಿಯೇ ಒಂದಿಷ್ಟು ದಿನ ಮಾರಾಟ ಮಾಡುವುದಕ್ಕೆ ಒಂದಿಷ್ಟು ಜಾಗ ಕಲ್ಪಿಸಿ ಕೊಡುವವರು, ಭೂಕಂಪ ವಾದಾಗ, ಪ್ರವಾಹ ಬಂದಾಗ, ಬರಗಾಲ ಪೀಡಿತ ಪ್ರದೇಶಕ್ಕೆ ಎಷ್ಟೊಂದು “ಸಾಫ್ಟ್ ಜನರು’ ತಮ್ಮ ಸಂಸ್ಥೆಗಳಿಗೆ ರಜೆ ಹಾಕಿ ಹೋಗಿ ತಮ್ಮ ಕೈಲಾದ ಕೆಲಸವನ್ನು ಮಾಡಿ ಬಂದಿರುತ್ತಾರೆ. ಹೀಗೆ ಹಲವಾರು ರೀತಿಯ ಸಮಾಜ ಮುಖಿ ಕೆಲಸಗಳಲ್ಲಿ ಯಾವುದೇ ಪ್ರಚಾರದ ಆಸೆ ಇಲ್ಲದೆ ಮಾಡುತ್ತಿರುತ್ತಾರೆ.

ಕೆಲವರು ಒಬ್ಬಂಟಿಗ ರಾಗಿಯೇ ತಮ್ಮ ಕೈಲಾದ ಸಮಾಜ ಮುಖಿ ಕೆಲಸವನ್ನು ಮಾಡುತ್ತಿದ್ದರೆ, ಇನ್ನು ಕೆಲವರು ತಮ್ಮದೇ ಆದ ತಂಡಗಳನ್ನು ಕಟ್ಟಿಕೊಂಡು ಕೆಲಸ ಮಾಡುತ್ತಿರುತ್ತಾರೆ. ಇಲ್ಲಿ ಒಂದು ವಿಷಯ ಪ್ರಮುಖವಾಗಿ ಹೇಳಲೇಬೇಕು, “ಸಾಫ್ಟ್ ಲೋಕದ” ಜನರು ತಾವು ನಡೆಸುವ ಸಮಾಜ ಮುಖಿ ಕಾರ್ಯಗಳಿಗೆ “ಬೇರೆ ಲೋಕದ” ಜನರಿಂದ “ಆರ್ಥಿಕ ಸಹಾಯ” ಕೇಳುವುದು ತೀರ ಕಡಿಮೆ.  ಆದರೆ ಇಲ್ಲಿ ಒಂದು ವಿಷಯ, ಸಾಫ್ಟ್ ಲೋಕದ  ಯಾವುದೇ ಎಂಜಿನೀಯರ್   ಮಾಡುವ ತನ್ನ ಕೆಲಸದಲ್ಲಿ ಕರಾರುವಾಕ್ಕನ್ನು ಬಯಸುತ್ತಾನೆ. ಸಹಾಯ, ದಾನ  - ಧರ್ಮ ಅಂತ ಸಾಫ್ಟ್ ಲೋಕದ ಜನಗಳು ಟೋಪಿ ಹಾಕಿಸಿ ಕೊಳ್ಳುವುದು ಕಡಿಮೆ. ಯಾವುದೇ ಕೆಲಸಕ್ಕೂ ಮುನ್ನ ಸಾಫ್ಟ್ ಲೋಕದ ಜನ  ತಯಾರಿಸುವ ಡೆಟ, ಮತ್ತು ಅವರ ಕೆಲಸ ಮಾಡುವ ಪ್ಲಾನಿಂಗ್ ಮಾತ್ರ ಎಲ್ಲರು ಮೆಚ್ಚುವಂತದ್ದು.  ಯಾಕಂದ್ರೆ ಸಾಫ್ಟ್ ಲೋಕ ಫೇಮಸ್ ಆಗಿರೋದೆ ಅವರ   ಪ್ಲಾನಿಂಗ್ ನಲ್ಲಿ .  ತಾವು ಮಾಡುತ್ತಿರುವ ಕೆಲಸದ ಸಂಪೂರ್ಣ ಅರಿವಿಲ್ಲದೆ ಅವರು ಕೆಲಸಕ್ಕೆ ಕೈ ಹಾಕುವುದು ತುಂಬಾ ಕಡಿಮೆ.

ಇಂತಹ ಕೆಲಸ ಮಾಡಿದ ಅನೇಕ ಜನರು ಎಷ್ಟೊಂದು ಸಲ ಮಾಧ್ಯಮಗಳಿಂದ ಶಹಬ್ಬಾಶ್ ಗಿರಿಯೂ ಪಡೆದಿದ್ದು ನಮ್ಮ ಕಣ್ಣ ಮುಂದಿದೆ. ಹಾಗಿದ್ದರೆ ಮತ್ಯಾಕೆ ತಡ,
ಕ್ಯುಬಿಕ್ ನಲ್ಲಿ ಕುತ್ಕೊಂಡು,

ಕೋಡಿಂಗ್ ನ್ನು  ಮಾಡ್ಕೊಂಡು,

ಸಮಾಜ ದ ಬಗ್ಗೆ ನೂ ಸ್ವಲ್ಪ ತಲೆ ಕೆಡಿಸ್ಕೊಂಡು,
ಪುನಃ ಸಾಫ್ಟ್ ಲೋಕದಲ್ಲಿ ಮುಳುಗಿ ಹೋಗೋ ಸಾಫ್ಟ್ ಲೋಕದ ಜನರಿಗೊಂದು “ಜೈ” ಅಂದು ಬಿಡಿ.

ವಾರದ ಬಿಲ್ಡ್ ಲೇಬಲ್: ಜಗತ್ತಿನ ಆಗು ಹೋಗು ತಿಳಿಬೇಕಾದ್ರೆ ಸಮಾಜದ ಮಧ್ಯೆನೇ ಇರಬೇಕಾಗಿಲ್ಲ, ೩x೩ ಕ್ಯುಬಿಕ್ ನಲ್ಲಿದ್ದು ಸಮಾಜದ ಬಗ್ಗೆ ತಿಳ್ಕೋಬಹುದು. ಅಷ್ಟಕ್ಕೂ ಸಾಫ್ಟ್ ಲೋಕದ  ಸಿಸ್ಟಮ್ ನ ಇಂಟರ್ನೆಟ್ ನಿಂದ ತಪ್ಪಿಸಿಕೊಂಡು ಹೋಗೋಕೆ ಯಾವ ಸುದ್ದಿಗೆ ತಾನೇ ಧೈರ್ಯ?

ಅಂಕಣ ೬ : ಸಾಫ್ಟ್ ಪರಪಂಚ

ಇನ್ನೇನು ಆಕಾಶಕ್ಕೆ ಮುತ್ತು ಕೊಟ್ಟವೇನು ಅನ್ನುವಷ್ಟು ಎತ್ತರದ ಕಟ್ಟಡಗಳ ಒಳಗೆ ಇರುವ ವಾತಾವರಣವೇ ಒಂದು ರೀತಿ.  ಹೊರಗಿನ ಜಗತ್ತಲ್ಲಿ  ಚಳಿ ಇದ್ದರೂ, ಬಿಸಿಲು ಇದ್ದರೂ, ಮಳೆ ಬಂದರೂ, ಗಾಳಿ ಬೀಸಿದರೂ  ಏನು ಗೊತ್ತಾಗದ ಹಾಗೆ ಒಳಗಡೆ ಒಂದೇ ರೀತಿಯ ವಾತಾವರಣ ವಿರುತ್ತದೆ. ಬೆಳಿಗ್ಗೆ ಸಾಮಾನ್ಯವಾಗಿ ೯ ಗಂಟೆಯ ಆಸುಪಾಸಿಗೆ ಇಂತಹ ಕಟ್ಟಡಗಳ ಒಳಕ್ಕೆ ಹೋಗುವ ನೂರಾರು ವಾಹನಗಳು, ಇದೆ ಕಚೇರಿಯ  ಸಾವಿರಾರು ಜನರನ್ನ ಪ್ರತಿದಿನವೂ ಹೊತ್ತೊಯ್ಯುವ ಹಲವಾರು ವಾಹನಗಳು- ಕಣ್ಣಿಗೆ ಕಾಣುವ ದೃಶ್ಯ ಸರ್ವೇ ಸಾಮಾನ್ಯ. ಇದು ನಮ್ಮ ಬೆಂಗಳೂರು!.
ಇಲ್ಲಿ ಗಗನ ಚುಂಬಿಸುವ ಕಟ್ಟಡಗಳು ಬಹುತೇಕ ಸಾಫ್ಟ್ ವೇರ್ ಕಂಪನಿಗಳು!.

ಕಂಪನಿಯ ಒಳಗಡೆ ಹೋದ ಉದ್ಯೋಗಿಗಳು ಮೊದಲು ಒಂದಿಷ್ಟು ಉಪಹಾರ ಜ್ಯೂಸು, ಕಾಫಿ, ಟೀ.. ಹೀಗೆ  ಮುಗಿಸಿಕೊಂಡು ತಮ್ಮ ತಮ್ಮ ಕ್ಯೂಬಿಕ್ ಗಳಲ್ಲಿ ಕುಳಿತರೆಂದರೆ  ಸಾಕು, ಸೂರ್ಯ ಒಂದು ದಿಕ್ಕಿನಿಂದ ಇನ್ನೊಂದು ದಿಕ್ಕಿಗೆ ಬಂದ  ಪರಿವೆ ಬಹಳಷ್ಟು ಜನರಿಗೆ ಇರುವುದಿಲ್ಲ. ಕೆಲಸ ದಲ್ಲಿ ಮುಳುಗಿ ಹೋಗುವ ಪರಿಯೇ ಅಂಥದ್ದು. ಸಾಫ್ಟ್ ಲೋಕದ ಬಹಳಷ್ಟು ಜನರಿಗೆ ಸೂರ್ಯನ ಬಿಸಿಲೆ ಮೈಗೆ ತಾಕುವುದಿಲ್ಲ, ಸಂಜೆಯ ತುಂತುರು ಮಳೆ ಅವರ ಮುಖಕ್ಕೆ ಸಿಡಿಯುವುದಿಲ್ಲ, ಒಂದಿಷ್ಟು ಜೋರಾದ ಗಾಳಿಯು ಅವರ ಹತ್ತಿರ ಬರದ ಹಾಗೆ ಕಟ್ಟಡದ ಎಲ್ಲ ಕಡೆಗೂ ಬಂದೋ ಬಸ್ತು ಮಾಡಲಾಗಿರುತ್ತದೆ.

ಹಾಗಂತ ಸಾಫ್ಟ್ ಲೋಕದ ಒಳಗಡೆ ಎಲ್ಲವೂ ಸಾಫ್ಟ್ ಆಗಿಯೇ ಇರುತ್ತದೆ ಅಂದುಕೊಂಡರೆ ಅದು ಶುದ್ದ ತಪ್ಪು. ಇಲ್ಲಿಯೂ ಒಂದಿಷ್ಟು ಗುದ್ದಾಟಗಲಿರುತ್ತವೆ, ಪರಸ್ಪರ ತಿಕ್ಕಾಟ ಗಳಿರುತ್ತವೆ, ಇಲ್ಲಿ ಕೆಲಸ ಮಾಡುವವರು ಮನುಷ್ಯರೇ ಆಗಿರುವುದರಿಂದ ಅವರಿಗೂ ತಮ್ಮದೇ ಆದ ಕಷ್ಟ - ಸುಖಗಳು ಇರುತ್ತವೆ. ಹೊರಗಿನ ಜಗತ್ತಿಗೆ ಕಾಣಿಸುವುದು ಕೇವಲ ನಮ್ಮ  ಎ. ಸಿ. ರೂಂ, ಮತ್ತು ತಿಂಗಳ ಕೊನೆಯಲ್ಲಿ ನಾವು ಎಣಿಸುವ ಸಂಬಳ. ಒಳಗಡೆ ಇರುವ ನಮಗೆ ಮಾತ್ರ ಗೊತ್ತು ಎ. ಸಿ. ರೂಂ ನಲ್ಲಿರುವ ಬಿಸಿ ಎಂತದ್ದು ಎಂದು.

ಮೊನ್ನೆ ನನ್ನ ಸ್ನೇಹಿತನ ಮನೆಗೆ ಭೇಟಿ ಕೊಟ್ಟಾಗ ಅವರ ತಂದೆ ಜೊತೆ ಒಂದಿಷ್ಟು ಮಾತಾನಾಡಿದೆ.

ನಮ್ಮಿಬ್ಬರ ಮಾತುಕತೆ ಹೀಗಿತ್ತು:

” ಏನಪ್ಪಾ ಹೇಗಿದೀಯಾ ?”

"ಚೆನ್ನಾಗಿದೀನಿ ಅಂಕಲ್”

“ಹೇಗೆ ನಡೀತಾ ಇದೆ ಕೆಲಸ?”

“ಚೆನ್ನಾಗಿ ನಡೀತಾ ಇದೆ ಅಂಕಲ್”

ಅದಕ್ಕೆ ಅವರು ಕೊಟ್ಟ ಉತ್ತರ ಹೇಗಿತ್ತು : “ ನಿಮ ಸಾಫ್ಟವೇರ್ ನೌರದು ಏನು ಕೆಲಸಾನೊ ಏನೋ, ಒಂದು ಗೊತ್ತಾಗೊಲ್ಲ. ನೀವು ಇಪ್ಪತ್ತು ನಾಲಕ್ಕು ಗಂಟೇನೂ computer ಮುಂದೆ ಕೂತಿರ್ತೀರಾ, AC Room ನಲ್ಲಿ ಇರ್ತೀರಾ.  ಒಂಥರಾ ರೆಫ್ರಿಜಿ ರೆಟರ್  ಒಳಗಿರುವ ಹಣ್ಣಿನ ಥರ ನೀವು. ಒಳಗೆ ಇರೋವರ್ಗೂ ಮಾತ್ರ ಆರಾಮಾಗಿ ಇರ್ತೀರಾ, ಹೊರಗಡೆ ಬಂದ ತಕ್ಷಣ ನಿಮ್ಮ ಒದ್ದಾಟ ನೋಡೋಕೆ ಆಗಲ್ಲ”

ಅವರು ಏನು ಆಲೋಚಿಸಿ ಈ ಮಾತು ಹೇಳಿದರೋ ನನಗೆ ಗೊತ್ತಾಗಲಿಲ್ಲ. ಆದರೆ ಅದರಲ್ಲಿ ಏನೋ ಒಂದು ಅರ್ಥ ಇದೆಯಂತ ಅನಿಸ್ತು. ಅದಕ್ಕೆ ನೀವೂ  ಓದ್ಕೊಳ್ಳಿ  ಅಂತ ಹಾಕಿದೆ.

ಇದು ಒಂದು ತರಹ “rat-race“ ಇದ್ದ ಹಾಗೆ. requirements ಅರ್ಥಮಾಡಿಕೊಳ್ಳಲು developer ಹೆಣಗಾಡುತ್ತಿದ್ದರೆ, developer ಬರೆದ ಕೋಡ್ ಹಿಂದೆ tester ಬಿದ್ದಿರುತ್ತಾನೆ, ಇವರಿಬ್ಬರ ಹಿಂದೆ ಪ್ರೋಸೆಸ್ ಎನ್ನುವ ಅಸ್ತ್ರ ಹಿಡಿದು Quality ಎನ್ನುವ ಮನುಷ್ಯ  ಕಾವಲು ಇರುತ್ತಾನೆ. ಇವರೆಲ್ಲರ ಮೇಲೆ ಮ್ಯಾನೇಜರ್ ಕುಳಿತಿದ್ದರೆ, ಮ್ಯಾನೇಜರ್ ತಲೆಯ ಮೇಲೆ ಯಾವಾಗಲು ಒಬ್ಬ ಕ್ಲೈಂಟ್ ಕುಳಿತಿರುತ್ತಾನೆ.

ಒಟ್ನಲ್ಲಿ, ಕಾರ್ಡ್ ಸ್ವೈಪ್  ಮಾಡುವ ಮೂಲಕ ಶುರುವಾಗುವ ನಮ್ಮ ದಿನಚರಿ, ಮತ್ತೆ ಮುಗಿಯುವುದು ಕಾರ್ಡ್ ಸ್ವೈಪ್ ಮಾಡುವ ಮೂಲಕವೇ. ಇದರ ನಡುವೆ ಇರುವ ನಮ್ಮ ಕೆಲಸ, ಒಂದಿಷ್ಟು ಮಾತು ಕಥೆ, ತಲೆ ಕೆಟ್ಟಾಗ ಕುಡಿಯುವ ಒಂದೆರಡು ಸಲದ ಕಾಫಿ-ಟೀ, ಹೆಣಗಾಟ- ಹಾರಾಟ.. ಹೀಗೆ .. ಇರುತ್ತದೆ ನಮ್ಮ ಬದುಕು. ಸಾಫ್ಟ್ ಲೋಕದ ಇನ್ನೊಂದು ವಿಶೇಷ ಎಂದರೆ ಇಲ್ಲಿ ನಮ್ಮ ದೇಹದ ಎಲ್ಲ ಅಂಗಾಂಗ ಗಳಿಗಿಂತ ಜಾಸ್ತಿ ಕೆಲಸ ವಿರುವುದು ತಲೆ ಮತ್ತು ಕಣ್ಣುಗಳಿಗೆ. ಸದಾ ಮುಂದೆಯಿರುವ ಕಂಪ್ಯೂಟರ್ ನೋಡಿ ನೋಡಿ ಕಣ್ಣುಗಳು ಉರಿ ಉರಿ ಯಾಗಿದ್ದಾರೂ ಕೆಲಸ ಮುಂದು ವರಿಯಲೇ ಬೇಕು. ಇನ್ನು ತಲೆಯ ವಿಷಯವಂತೂ  -  ಅದು ಕೆಲಸ ಮಾಡುವುದರಿಂದ  ಹಿಡಿದು, ಹೊರಗಿನಿಂದ ಬರುವ ಎಲ್ಲ ರೀತಿಯ ಒತ್ತಡಗಳನ್ನು ನಿಭಾಯಿಸುವ ವರೆಗೂ ಎಲ್ಲ ಕೆಲಸವೂ ತಲೆಯ ಮೇಲೆಯೇ ಇರುತ್ತದೆ. ಹೆಚ್ಚು - ಕಡೆಮೆ ಟೈಪ್ ಮಾಡುತ್ತೇವೆ ಎನ್ನುವ ಕಾರಣ ದಿಂದ ಕೈ ಬೆರಳುಗಳನ್ನ ಬಿಟ್ಟರೆ ಉಳಿದೆಲ್ಲ ಅಂಗಾಂಗ ಗಳಿಗೂ ಇಲ್ಲಿ ಕಂಪ್ಲೀಟ್ ರೆಸ್ಟ್ !

ಈ ವಾರದ ಬಿಲ್ಡ್ ಲೇಬಲ್ : ಸಾಫ್ಟ್ ವೇರ್ ನಲ್ಲಿ ಕೆಲಸ ಮಾಡೋರ ಮೈ ಕೈ ಎಲ್ಲ ತಣ್ಣಗೆ, ತಲೆ ಮಾತ್ರ ಸದಾ ಬಿಸಿ.