ಸೋಮಾರಿ ಸ್ನೇಹಿತರು

ಎಲ್ಲರು ಸ್ನೇಹಿತರಾದರೆ ಸೋಮಾರಿಗಳಾಗಿಬಿಡುತ್ತೀವಿ, ಒಂದಿಬ್ಬರಾದರೂ ವಿರೋಧಿಗಳು ಇದ್ದರೆ ಒಂಚೂರು ಎಚ್ಚರದಿಂದಾರು ಇರ್ತೀವಿ.

ನಾಷನಲ್ - ಹೈವೆ : ಕಚ್ಚಾ- ರಸ್ತೆ

ಮನಸ್ಸು ತುಂಬ ಗಲಿಬಿಲಿಗೊಂಡಾಗ ಸಾಗುವ ದಾರಿ  "ನಾಷನಲ್ - ಹೈವೆ" ಥರ ಇದ್ದರೂ  ಪ್ರಯಾಣ ಕಷ್ಟವೆನಿಸುತ್ತದೆ,

ಮನಸ್ಸು ತಿಳಿಯಾಗಿದ್ದಾಗ ಸಾಗುವ ದಾರಿ " ಕಚ್ಚಾ- ರಸ್ತೆ"  ಆಗಿದ್ದರೂ ಪ್ರಯಾಣ ಸುಲಭವೆನಿಸುತ್ತದೆ.  

ಸಮಚಿತ್ತ

ಎಲ್ಲ ಸಮಯ - ಸಂಧರ್ಭ ಗಳಲ್ಲಿಯೂ ಸಂತೃಪ್ತಿ ಯಾಗಿ 'ಸಮಚಿತ್ತ' ದಿಂದ ಇರುವವನಿಗೆ, ಸ್ವರ್ಗಕ್ಕೆ ಕಿಚ್ಚು ಹಚ್ಚುವ 'ಅರ್ಹತೆ ಮತ್ತು ಸ್ವತಂತ್ರ' ಎರಡೂ  ಇರುತ್ತದೆ.

ಆಲೋಚನೆ - ಕೆಲಸ

ತಲೆಯ ತುಂಬಾ ಆಲೋಚನೆಗಳೇ  ಓಡಾಡುತ್ತಿರುವಾಗ, ಯಾವ ಕೆಲಸವೂ ಮುಂದಕ್ಕೆ ಸಾಗುವುದಿಲ್ಲ. 

ಆಲೋಚನೆಗಳನ್ನೆಲ್ಲ ಒಂದು ಕಡೆ ಗಂಟು ಕಟ್ಟಿಟ್ಟು, ಕೆಲಸಗಳ ಜೊತೆ ಮುನ್ನಡೆಯುವುದು ಚೊಲೊ(ಲೇಸು).

ಒಂದು ಹೆಜ್ಜೆ

ಎಷ್ಟೇ ದೊಡ್ಡವರಿರಲಿ, ಚಿಕ್ಕವರಿರಲಿ, ನಡೆಯುವಾಗ ಒಂದು ಸಲಕ್ಕೆ "ಒಂದು ಹೆಜ್ಜೆ" ಯನ್ನು ಮಾತ್ರ ಇಡಲಿಕ್ಕೆ ಸಾಧ್ಯ.

ಹೀಗಾಯ್ತು - ಹಾಗಾಯ್ತು

"ಹೀಗಾಯ್ತು" ಅಂತ ಹೇಳಿದರೆ, "ಹಾಗಾಗಿದ್ದರೆ ಇನ್ನು ಚೆನ್ನಾಗಿರ್ತಿತ್ತು" ಮತ್ತು  

"ಹಾಗಾಯ್ತು" ಅಂತ ಹೇಳಿದರೆ, "ಹೀಗಾಗಿದ್ದರೆ ಸರಿಯಾಗಿರ್ತಿತ್ತು" ಅಂತ ಅನ್ನೋರ ಮುಂದೆ 

 "ಹೀಗಾಯ್ತು, ಹಾಗಾಯ್ತು" ಅಂತ ಹೇಳೋದೇ ನಮ್ಮ ಮೂರ್ಖತನ.

ಇಂಪ್ರೆಸ್ - ಸರ್ಕಸ್

ಯಾರ್ಯಾರನ್ನೋ ಇಂಪ್ರೆಸ್ ( ಮನವೊಲಿಸುವ  ಕೆಲಸ ) ಮಾಡಲಿಕ್ಕೆ  ಸರ್ಕಸ್ ಮಾಡುವ ಬದಲು ನಮ್ಮ ಮನಸ್ಸನ್ನು ತೃಪ್ತಿಗೊಳಿಸುವ ಕೆಲಸ ದಲ್ಲಿ ತೊಡಗಿಕೊಳ್ಳುವುದು ಉತ್ತಮ.